Aanvanklik het die skool as Laerskool Manor Heights bekend gestaan, maar die skoolkomitee het gevoel dat die skool na Mnr. Frans Conradie, die destydse LPR en latere LV, vernoem moes word, aangesien hy ‘n prominente rol in die stigting van die skool gespeel het. So is Laerskool Frans Conradie gebore en op 22 Januarie 1962 is die deure geopen vir 4 onderwysers en 129 leerders. Mnr. A.P. Rossouw was die eerste skoolhoof en kan met reg as die vader van Laerskool Frans Conradie beskou word. Oor die jare heen is die skool ontwikkel tot ‘n baken van uitnemendheid wat geskoei is op die skoolleuse, "Waarheid". Die leuse is afkomstig uit die toespraak van Mnr. Dodds, inspekteur van onderwys, tydens die openingseremonie. Ons skoollied is geskryf deur ds. P.D. Strauss, eerste predikant van die Eendrag-gemeente, en die toonsetting is deur Prof. Wegelin van die UPE Musiek Fakulteit gedoen. In 1969 is Frans Conradie tot ‘n Afrikaansmedium skool verklaar en word vandag nog as sodanig erken. Sedert die skool in 1962 sy deure geopen het, en die eerste leerder, C.J. Rossouw, die voordeur betree het, het Mnr. A.P. Rossouw en sy personeel, in samewerking met die onderskeie skoolkomitees en OOV’s (later verander na FOV), oor die jare heen fondsinsamelings gehou om te sorg dat ons oor die fasiliteite van vandag beskik. Mnr. Rossouw was skoolhoof sedert die stigting tot en met Desember 1984.
In Januarie 1985 het Mnr. J.H. Bester die leisels as skoolhoof oorgeneem en het vir 17 jaar tot en met Junie 2002 as skoolhoof opgetree. Hy is opgevolg deur Mnr. F.W.M. Engelbrecht wat aan die stuur van sake was tot 2008, waarna hy deur Mnr. D.C. Basson opgevolg is. Mnr. Z. Grobler neem in Julie 2023 die leisels oor en is tans die skoolhoof van ons skool. Daar is 602 leerders in die skool met 3 klasse per graad vanaf graad R tot 7.
